الدرس الثانى فى تعليم الفوتوشوب

فى أول درس اخدنا فكره عامه عن واجهة برنامج الفوتوشوب واتعرفنا على اجزائها
دلوئت هنبدأ نشرح أول جزء وأهم جزء و هو صندوق الأدوات الموجود جهة اليسار
بطول واجهة البرنامج


نسمى الله ونبدأ مع بعض نتعرف النهرده على أول مجموعة أدوات داخل الصندوق:
أدوات التحديد + أداة التحريك + أداة القص

أولا أدوات التحديد ( selection tools ) :
وأدوات التحديد بصفه عامه مجموعه من الأدوات بنستخدمها لتحديد جزء معين
من الصوره علشان نئدر نعدل فى الجزء ده او نحركه من مكانه بدون متتأثر باقى
الصوره .
عندنا 3 أنواع من أدوات التحديد :

(1) أدوات التحديد المنتظم Marquee Tools

ومن اسمها نفهم انها بتدى تحديد منتظم على شكل ( مستطيل - مربع - دائره - شكل
بيضاوى - سطر - او عمود )

وهما 4 أدوات مختفيين تحت أداة المستطيل - بالضغط المنتظم على أداه المستطيل
بتظهر لنا باقى الأدوات



1- أداه المستطيل Rectangle marquee too

و بتدينا تحديد على شكل مستطيل او مربع - واستخدامها سهل جدا روح على الأداه
واضغط عليها بالماوس بعدين روح على ملف العمل او الصوره وتعالى على الجزء
الى عايز تحدده واضغط بالماوس مع السحب من أعلى اليسار الى أسفل اليمين .


2 -أداه الدائره او الشكل البيضاوى Elliptical marquee too

ودى بتدى تحديد على شكل دائره او شكل بيضاوى وكمان استخدمها بيكون بنفس الطريقه اضغط واسحب من أعلى اليسار الى أسفل اليمين
روح على الصوره واضغط بالأداه واسحب هتلائى التحديد على شكل بيضاوى -
وعلشان تخليه على شكل دائره اضغط على مفتاح shift فى لوحه المفاتيح وانت
بتستخدم الأداه .

3 - أداة السطر الواحد Single row marquee tool

4 -أداة العمود Single column marquee tool


وبالنسبه لأداة السطر و أداة العمود بمجرد أختيارك للأداه روح على ملف العمل
وانقر بالماوس هتلائى اترسم سطر او عمود بدون اى سحب - وياريت تنسوا اخر
أداتين دول فى الأول وكل التركيز يكون على أداة المستطيل والدائره

(2) أدوات التحديد الحر LASSO Tools

وهما أدوات بيستخدموا لتحديد المساحات غير منتظمة الشكل
وعددهم 3 مختفيين تحت الأداه الأولى بالضغط المنتظم بيظهروا امامنا



(1) أداة Lasso : تستخدم لعمل تحديد عشوائى حول اى مساحه فى الصوره
أختار الأداه وأذهب الى ملف العمل أنقر فوقه بالأداه واسحب الأداه فوق المساحه
التى تريدها باى شكل عشوائى وأنقر نقر مزدوج لاغلاق التحديد

(2) أداة Polygon lasso tool : تسمح لك بالربط بين النقاط - انت تنقر عدة
مرات لوضع نقات حول المساحه التى تريد تحديدها وبعدين تنقر نقر مزدوج بالماوس
هتلائى تم رسم شكل ربط النقاط ببعض وحدد المساحه

(3) أداة Magnetic lasso tool - ودى عامله زى المغنطيس أختار الأداه
وروح على ملف العمل او الصوره اضغط بالاداة وحركها هتلئيها بتنجزب للمساحات
ذات اللون الواحد وتختارها


(3) أداة العصى السحريه Magic Wand

ودى اخر نوع من أنواع أدوات التحديد وأداه سهله جدا هى كمان بتحدد المساحات
ذات اللون الواحد بس من غير اى مجهود فى السحب والتحريك
روح للأداه اختارها وتعالى على الصوره وأنقر فوئها هتلائى تحديد اتعمل حول
المساحه الى لها نفس اللون


كده احنا خلصنا أدوات التحديد بأنواعها التلاته فاضل معانا أداة التحريك وأداة القص

(4) أداة التحريك Move Tool

]طبعا بعد منحدد جزء من الصوره ممكن نحتاج نحركه من مكانه فى الحاله دى
نخلص تحديد الجزء الأول بعدين نروح على أداة التحريك ونضغط عليها بالماوس
ونروح على ملف العمل او الصوره بتاعتنا وننقر عليها بالماوس هيظهر لنا سهم
الحركه نروح على الجزء الى محتجيين نغير مكانه وهتلئيه بيتحرك معاك وانت
بتحرك الماوس وتئدر تنئله فى اى مكان تحبه


(5) أداة القص Crop Tool

وببساطه كده احنا ممكن نحدد مساحة ملف العمل وبعد منكون الصوره نلائى اننا محتجين نلغى اجزاء لانها ملهاش لزمه هنروح على أداة القص ونختارها بعدين
نيجى على الصوره بتاعتنا ونضغط فوقها ونسحب من أعلى اليسار الى أسفل اليمين
هتلائى مربع اترسم وحوليه مقابض تئدر تختار المساحه الى انت محتاجها على كيفك
وتخليها داخل المربع ده وبعدين تدوس مفتاح Enter من لوحة المفاتيح هتلائى
كل الأجزاء الغير مرغوب فيها اختفت من تصميمك


بكده اكون خلصت شرح أول مجموعة أدوات فى صندوق الأدوات والدرس الجاى
هيكون ملف فوتوشوب مفتوح علشات التدريب العملى على استخدام الأدوات
بتاعت النهرده ويارب شرحى يكون عجبكوا وفهمتوا منه